Emilian blogi omalla murtheella

 

Molen tässä reilu puoli vuotta saanu tutustua elähmään ja työntekhoon täälä Laitilassa. Ja häätyy nyt sanoa reilusti suohraan, että ei yhtään huono paikka! Ei tämä koko aikaa helppoa ole ollu, ko molen yrittäny oppia tuntehmaan uusia ihmisiä töissä, ja koittanu sisäistää tätä minun päivittäistä perustyötä. Ja siihen pääle vielä korona! Ensin rajoituksia ja sitte niitä on purettu pois, ja nyt sitte uusia suosituksia tullu. Mutta kyllä molen kaikenkaikkihaan viihtyny täälä.

Päivittäin mie katton läpi sähköpostit, ja vastailen niihin. Puhelinki ruukaa soija joka päivä. Mutta son mukavaa että saan niitä viestejä ja puheluita ko sillälailla mie samalla tutustun teihin paikallissiin ihmissiin ja sitte myös niihin kaikhiin ihmissiin keitten kanssa tehhään yhteistyötä. Viikottain mie katon tulheet laskut ja ne häätyy tarkastaa ja hyväksyä. Ja kerran viikossa mulla on voimaa vanhuutheen –liikuntaryhmä.

Aina ko kaupunki tekkee jotaki uutta liikuntapaikkaa, niinkö nyt ne voimaporthaat, taikka remppaa jotaki vanhaa, niin aina yritethään saaha rahoitusta siihen rojektiin. Siihe liittyen mie kirjotan semmosia hankehakemuksia. Ne viepi yllättävän paljon aikaa, mutta son kyllä palkittevvaa ko saa sen kirjotuksen valhmiiksi ja hakemuksen hyväksytyksi.

Kirjottamista vaativia on kans nuot vipsit ja sivvan esitykset. Vipsit on viranhaltijapäätöksiä. Sivva on sivistysvaliokunta, missä tehhään semmosia päätöksiä mitä mie taikka minun esimies ei saaha päättää. Niitä on paljon erilaisia asioita. Niitäki molen oppinu tässä puolen vuen aikana kirjottahmaan paremmin.

Net liikunthaan liittyvät työt ei kuitenkhaan ole ainoat hommat mitä mulla on. Mulle kuuluu kans uusitten kuntalaisten kottouttaminen. Tässä avittaa semmonen ko miettii, että mitä sie itte halvaisit ko muutat uutheen paikhaan? Ja tätä häätyy muistaa miettiä myös kansainvälisestikki tätä asiaa! Ko meille tänne Laitihlaan muuttaa paljon väkeä tuolta suomenrajojen ulkopuolelta. Molen sitä mieltä että heän häätyy kans tykätä olla täälä! Huomasiks muuten että mie kirjotin että ”meille tänne”? Mie piän jo itteä laitilalaisena, ainaki osittain :)

Nuot on semmosia asioita joita mie tehen ihan suunnitellusti. Mutta aina se päivä ei menekhään niinkö mie meinasin. Välhiin tullee yllättäviä asioita, joihin häätyy reakoija heti ja heti hoitaa ne järjestykseen. Eli vois sanoa, että aika monipuolista hommaa! Eikä koskaan tiiä ko aamulla töihin tullee mitä se päivä tuo tullessaan, ja son minusta hyä asia :)

 

Miehleistä syksyä kaikille!

Emilia Andersson

Vapaa-aikapäällikkö

Julkaistu 19.10.2020